Халкьдиз истеклу алим.
Мегьамед Мегьамедович Гьажиев халкьдин къагьриманрин, берекат гьасилзавайбурун, руьгьдин девлет ахтармишзавайбурун камаллу тербиячи яз хьана. Ам агъзурни муьжуьд вишни кьудкъанни цIерид лагьай йисуз гилан Мегьарамдхуьруьн райондин Мегьарамдхуьре савадлу хизанда дидедиз хьана ва агъзурни кIуьд вишни яхцIурни цIемуьжуьд лагьай йисуз кечмиш хьана.
ТIебии алакьунар авай гадади агалкьунралди Алкьвадрин медреса, Кьасумхуьруьн мектеб, Дербентда ва Къубада муаллимвилин курсар куьтягьна, хайи хуьруьн советрин школадин муаллимвиле ва заведишвиле кIвалахна. Агъурни кIуьд вишни къанни цIикьвед лагьай йисуз Дагъустандин пединститутда, ахпа Москвада аспирантурада кIелна. Лезгийрикай сифте яз филологиядин илимрин кандидатвилин ва докторвилин дережаяр къазанмишна.
Мегьамед Гьажиев илимдиз анжах къад йисуз къуллугъ ийиз агакьна. И йисара чIалан, литературадин алемда ада вичин гъил хукIун тавур са пIипIни тунач. ЧIалан гуьрчегвилел, илимдин деринвилел, методикадинни педагогикадин истемишунар кьилиз акъудунал гьалтайла, чIалай, литературадай адан ктабрив гекъигиз жедайбур авач лагьайтIа, ягъалмиш жедач. Алимди урус чIаланни лезги чIалан гьар жуьредин са шумуд словарь туькIуьрна. Мегьамед Гьажиева сифте яз кьве ктабдикай ибарат тир «Лезги чIалан синтаксис» тIвар алай монографияр кхьена, фонетикадай, диалектологиядай, морфологиядай, орфографиядай, стилистикадай ва маса терефрай ахтармишунар авуна.
Халкьдиз бегьерлу кIвалах авуналди ада вичин халкьдин патай истеклувални къазанмишна. Адан тIвар Мегьарамдхуьруьн сад лагьай юкьван школадал ва куьчедал эцигнава.
